|
أنا والليل والعبرة وجرح الخاطر المكسور | |
|
| ونفسٍ من هجير البعد والحرمان مقهورة |
|
وقلبٍ ظامي لشوفك ولا يروي ظماه بحور | |
|
| وعينٍ تحتري لحظة غياب الطيف وحضوره |
|
ونار تنطفي مرة ومرة تشتعل وتثور | |
|
| وأقول النار مقدورة وهي ماهي بمقدورة |
|
حسبت الليل بغيابك يمرن الليالي دهور | |
|
| وكني شايل بقلبي ليال الوقت وشهوره |
|
تصبرت وتقدرت وبنيت من الخيال قصور | |
|
| إلين ان الجفا شد الركايب وانتهى دوره |
|
تحريتك على درب القصايد من ثلاث شهور | |
|
| وحشا مامات لك غصن يشف الماي بجذوره |
|
تخيرت الغرام وجيت لاراضي ولامجبور | |
|
| وجيتي تسبقين خطاك مرضية ومجبورة |
|
وأنا ماكان لي راغبة أبين وأكشف المستور | |
|
| ولكن الغرام أكبر من الخفاق وشعوره |
|
جمال وود وعيون ودلال وكبرياء شعور | |
|
| وفتنة تخذل عيون النهار وينطفي نوره |
|
ولك في خافقي صورة تلاشت بين ضي ونور | |
|
| وأخاف أسكت من الفرحة وتنطق بإسمك الصورة |
|
عرفتك وانتهت رحلة قساوة قلبي المهجور | |
|
| وألا ياجملة أيام الجفا والصد مشكورة |
|
خذتني للجفا عزة وأخذني للعناد غرور | |
|
| وأخاف أكون بعنادي حبيب ومات بغروره |
|
وإذا كانت مسافات الخيانة للغرام قبور | |
|
| وش اللي يجبر العاشق يخون ويحفر قبوره |
|
وش اللي يجبر الشاعر يدور للشعر جمهور | |
|
| مادام إنتي محبينه وعشاقه وجمهوره |
|