إبلاغ عن خطأ
ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك
انتظر إرسال البلاغ...
|
لما حدودي تدخل ف حدودك |
بالقى الوقت يدوب ف شفا يف الساعة |
زى ما حتة سكر دابت |
جُوَه شفايف طفل .... دا ساعات |
وساعات البحر بيعصر كل هدومه ف حلقى |
باشتاق لك |
نفس الحلم المدبوح |
على أول ناصية لأول طلعة فجر |
نفس الروح اللى بتترنح |
على حبل وريد مشدود بين قلبى وقلبك |
يتبعتر جوايا الطفل |
ما بين اللهفة وبين الخوف .... ضُميه |
ضُمى فيه الولد |
اللى يخربش وش الحواديت ... |
وينام |
باهرب منك واستناكى |
باستنى يجينى الليل |
واغسل وشى بالعتمة |
وأدوب فيها ملامحى |
ولا أشوفك وانتى بتتساومى |
عارفك هاتبيعى ... معذورة |
هايحطوا فوق راسك ألف وليمة للغربان |
مين هايفسر أحلامك غيرى |
ونتوه ف الضلمة |
والسكة بتخلع كل عنيها |
وأمد صوابعى العميا وأحسس على تقاطيعك |
يمكن أوصل ... ونتوه |
وبسرعة صوابعى بترجع ويزيد العما جواها |
وتحسس على تقاطيعى يمكن ... ونتوه |
تحت حيطان الليل |
على ناصية حارة الخوف |
أو تحت حراسة الزيف ... باكره مواعيدك |
ماعدتش خايف ... |
الحلم اللى مفرع فى حشاكى ... ابنى |
الخوف اللى بيرضع من صدرك ... |
الزيف اللى بيحبى على وشك ... |
... ماعدتش خايف |
لحد آخر شهقة لأنفاس الانتظار |
عارفة لما القسوة بتغرس سكينها ف لسانك |
كل عيون العتمة تفتح جوايا |
كل سنين اليتم بتغرس سنابلها اليابسة ف دمى |
باحتاج لخضارك |
باهرب منك ليكى ... نفس السجن بيتكرر |
باشتاق لك |
باشتاق ترجعلى ملامحى |
وأعرف ان انتى اللى انا بادخل فى حدودها ... |
وأتوه |