 إبلاغ عن خطأ
ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك
ادخل الكود التالي:
انتظر إرسال البلاغ...
|
| لو رصاصه واحده |
| رصاصه واحده .. معايا |
| رصاصه، أحمي بلدنا |
| رصاصه أحمي حبيبي |
| وطني .. حبيبي |
| لو بحارب |
| وتفضل .. ولو رصاصه |
| رصاصه واحده معايا |
| الطلقه ح تكون البدايه |
| الطلقه ح تزغد في عُرسي |
| الطلقه راح تقدر تجاوب |
| الطلقه ح تزغرد في أفراح البلاد |
| الطلقه ح تغنِّي في أعياد الميلاد |
| الطلقه بتقرَّب ميعاد |
| الطلقه راح تحمي الولاد |
| ويتولد ناس جُداد .. جداد |
| وتقلع الأرض الحزينه |
| ملابس الحداد |
| لو رصاصه واحده معايا |
| لو رصاصه تانيه تنطلق |
| رصاصه تالته تنطلق |
| رصاصه رابعه تنطلق |
| رصاصنا احنا كلنا |
| الدنيا من جديد .. يا خلق، |
| الدنيا تتخلق. |
| معنى وجودنا |
| معنى سلامنا يتخلق |
| لو رصاصه |
| رصاصه أحمي حبيبي |
| وطني .. حبيبي |
| لآخر طلقه في صمودي |
| باحفر معنى لوجودي |
| ولو تنزف .. وتنزف جراحي |
| الكلمه ح يقولها سلاحي |
| رصاصه واحده معايا |
| رصاصه أحمي حبيبي |
| .. وتمر أنغام الصور |
| واحد جنب واحد جنب ألف |
| الجميع .. في الصفّ |
| الشيوخ والولاد والخريف والربيع .. في الصف |
| .. وعلى الوتر |
| تعزف الغنوه الرصاص |
| الرصاص رايه |
| رايه فوق سدر النهار |
| رايه بتغطي المرار .. وزحمة التكرار |
| والربيع .. والخريف |
| والشتا.. والصيف |
| صف .. ورا صف .. ورا صف |
| والشجاع .. و الجبان .. في الصف |
| راحوا يقطفوا شجر النهار |
| ولما كانوا بينزفوا |
| كانت بتطرح من فوقيهم غناوي النار |
| وكانوا بيزرعوا مطرح دمار الحرب، |
| نهار الانتصار |
| اتشردوا من كل وطن |
| أصبح ولادهم و أولاد ولادهم، |
| يشحتوا جوه وطنهم .. وطن |
| اتشردوا من كل وطن |
| لكن ما اكتفوش بالحزن |
| ما لبسوش ملابس الصمت |
| ما سقطوش |
| ما تعبوش |
| كان حلمهم بيحلم بطلقة الرصاص |
| الحرب |
| الحرب |
| الحرب .. واجب |
| ومصر فوق العين .. وفوق الحاجب |
| لو رصاصه |
| رصاصه أحمي حبيبي |
| وطني حبيبي |
| واجب يا إنسان الزمن الحاضر |
| يا إنسان الزمن الجاي |
| دوّر باستمرار عن سكه |
| وازرع فيها جناين ضي |
| الحرب |
| الحرب |
| الحرب |
| لأجل سلام الدنيا يعيش |
| لأجل ولاد الدنيا تعيش |
| لأجل وطنَّا |
| يفضل رافع راسه .. رافع راسه في وسط الدنيا يعيش |
| .. والحرب |
| في الحرب يا وطني تملي يعيش |
| إنسان الزمن الحاضر |
| إنسان الزمن الجاي |
| بقول لكم: |
| تنساني دراعي اليمين |
| لو نسيت القدس |
| تنساني عينيا لِ تْنين |
| لو نسيت القدس |
| ينساني الفرح .. والنهار |
| وضلة الديار، |
| لو نسيت القدس |
| وَمُوت في الزمن وحدي أموت |
| مُهمل بلا تواريخ |
| لو نسيت القدس |
| تنساني الحضاره .. والتاريخ |
| تنساني السنابل والغيطان وشجر التوت |
| لو نسيت القدس |
| تنساني الشموس والنجوم .. و القمر |
| لو نسيت القدس |
| تنساني بسمة الولاد |
| وطرحة الزفاف |
| لو نسيت القدس |
| تنساني أفراحي |
| تنساني الشوارع والبيوت والحب |
| لو نسيت القدس |
| ولادنا |
| بلادنا |
| بيحلموا ببكره اللي جاي |
| بكره اللي طالعه شمس يومه، |
| طالعه تتبسّم فوق شموس الضي |
| نفسي أغنيلك يا شعبي يا بسيط الشكل والمعنى |
| نفسي أغني من زمان |
| نفسي .. أغني و مش حزين |
| نفسي أغنيلك نغم فرحان |
| نغم يرقص مع صوت الأمل ويسجد مع تكبيرة الأدان |
| نفسي أغنيلك يا شعبي من زمان |
| لو رصاصه |
| رصاصه أحمي حبيبي |
| وطني حبيبي |
| أي إنسان بيحب بكره |
| ويحب شمسه تنوّر الجايات |
| مش بدم الأمنيات |
| مش بجرح الأغنيات |
| إنما تفضل كلمته زي الرايات |
| يندبح |
| يتسجن |
| يموت |
| تفضل كلمته هيا الرايات |
| مَثَلْ .. وقالوه |
| الأب .. عن أبوه |
| مَثَلْ .. وشافوه |
| ولو اتقتل ميات |
| ما بيقدروش يقتلوه |
| وف ضل الحريه بيرتاح الناس |
| يتغطوا بغطاها |
| الأبيض والأسمر والأصفر .. كل الأجناس. |
| على كلمة حريه، |
| بيفوق الناس |
| أنا مصر يا ولادي، أنا باصْحى من تاني |
| نزْف الجراح |
| صوت السلاح |
| أحلى نغم في وداني |
| تسلمي يا بلادي .. تسلمي |
| بارسم صباحي من دَمِي |
| الله أكبر يا بلادي تسلمي |
| وتسلمي |
| يا دْراعات الرجَّاله .. تسلمي |
| الله أكبر يا بلادي تسلمي |
| يا دْراعات الرجَّاله .. تسلمي |
| الله أكبر يا بلادي .. |
| م الدم طالع نهار |
| صوت الرصاصه النغم .. |
| والخلوه اصرار |
| الله أكبر يا بلادي |
| م الجرح طالع ورود |
| صوت الرصاص بيغني |
| وبيهز الوجود |
| هنا فوق أرض سينا |
| بنعلِّم الليل ع الجرح يصحى |
| بنعلم الحزن الابتسام |
| بنعلم النار تروي نهار الانتصار الجاي |
| بنعلم الحجر اللي مرمي، |
| بنعلمه لغة الكلام |
| هنا الأرض و التاريخ |
| والحلم و المستقبل، |
| فارد ايديه لينا |
| في القلب الوطن |
| في القلب سينا |
| النهارده يا بلادي |
| كل شيء أصبح لُه معنى |
| كلمة سلاح |
| نور الصباح |
| ضحْك الولاد |
| طَعم الميعاد، |
| أصبح له معنى |
| السلام في عصرنا |
| السلام هنا .. أنا باصنعه |
| ونا ف ايدي السلاح |
| ونا في قلبي شجرة زتون خضرا |
| وطالع اسم مصر |
| طالع م الجراح |
| طالع يغني: |
| كل شيء أصبح له معنى |
| كلمة وجود |
| كل الوجود |
| أصبح له معنى |
| سينا |
| ما قلناش أبدًا نسينا |
| في القلب سينا |
| وطول ما النبض فينا |
| في عيونَّا سينا |
| في القلب سينا |
| خيامنا .. ما فيهاش جناين |
| خيامنا .. مالهاش مداين |
| وقمرنا ع الخيام |
| بندقيه وسلام |
| بندقيه ف سدر ليله مُعتمه |
| وسلام لكل عيله منِّنا |
| وأرضنا .. |
| قلبها اتحوّل خناجر |
| وردها بيطرح خناجر |
| علشان خيامنا |
| مافيهاش جناين |
| لو رصاصه |
| رصاصه أحمي حبيبي |
| وطني حبيبي |
| العدوان أفظع شيء |
| ولا شيء .. |
| بيصدّ العدوان غير ايد الرجَّاله |
| أحلى حاجه |
| إن البشر يمشوا وفوق سماهم أسامي ولادهم، |
| مرفوعه زي العلم |
| يفوتوا ف كل صعب |
| يدوسوا .. ع الألم |
| أحلى حاجه |
| إن ف ليالي البرد |
| نتغطى بدفا الحريه |
| وإنّ لما نحب |
| يكون حبنا حريه |
| أحلى حاجه |
| في الحرب ... |
| ولما يرسم دمارها ورمادها على الوشوش كلام تاني |
| أحلى حاجه |
| ما نمطش في المعاني |
| ما نقولش معنى، ملوش تاني |
| ما نتكلمش كلمه ع الجراح تنزف .. تعاني |
| أحلى حاجه |
| لغة الرصاص |
| لو رصاصه |
| رصاصه أحمي حبيبي |
| وطني حبيبي |
| لو |
| ولو |
| وآه |
| لو قلبي يعيش في الآه |
| باضيع |
| أضيع |
| أضيع |
| ويهرب الربيع |
| ونا باحلم بالبراح |
| بالدنيا .. وابتسامه |
| وأعدي ع الجراح |
| يا دنيا .. يابتسامه |
| كل لحظة بافتكر مصر التاريخ القديم |
| مصر التاريخ الجديد |
| طعم الأمل موجود |
| وف قلب نار الحرب |
| بتطرح الورود |
| بس لازم تعرفوا |
| تعرفوا تقتلوا الكلمه الدخيله |
| تعزلوا الكلمه الغريبه |
| لازم تعرفوا |
| إن الدموع والكلام |
| ما يقدروش يخافوا ع السلام |
| ولا بيرجَّعوا الأرض السليبه |
| لو رصاصه |
| رصاصه أحمي حبيبي |
| وطني حبيبي |
| سلاحي .. صبَّاحي |
| بيكتب جراحي |
| فداكي يا مصر |
| يا درعي .. يا سيفي |
| يا لقمة رغيفي |
| فداكي يا مصر |
| بقول: يا بلادي |
| في لحظة ميلادي |
| تعيشي يا مصر |
| اقفلوا الكراريس، وانتهى درس النهارده |
| لكن عشان تحيُوا ما تنسوا اللي حصل |
| افتحوا عيونكم كويس واعرفوا |
| إن مطرح كل ورده |
| امبارح .. والنهارده |
| كان فيه شهيد |
| كنا .. كلنا |
| وإحنا بنحارب كل لحظه |
| بندوس في كل خطوه ع الخرافه |
| ع العذاب |
| على كل شيء .. يكرهه الأحباب |
| على الأحزان |
| على التواكل |
| على أي شيء ملوش معنى |
| النهارده |
| كل شيء أصبح لُه معنى |
| كلمة نهار |
| ضحكه .. جوه دار |
| مفيش محال، |
| أصبح له معنى |
| طلعة النهار |
| رنّة الأوتار |
| الناس في الشوارع |
| الناس في الديار |
| الحياه في عيون ولادنا |
| كل شيء أصبح لُه معنى |
| ايدي على سلاحي |
| في قلبي شجرة زتون خضرا |
| باحب الأرض ليَّا |
| باحب الأرض تبقى أرضي أنا ليا |
| باحب أسلّم بإيدي |
| أسلِّم وأبوس ترابها |
| أتعب عليها |
| أنزف عليها |
| وف قلبي شجرة زتون خضرا |
| باشقى |
| باتعب |
| بانزف |
| أموت |
| يفضل في قلبي السلام |
| ويفضل في ايدي السلاح |
| لو رصاصه |
| رصاصه أحمي حبيبي |
| وطني حبيبي |
| مصر |
| مصر |
| مصر |
| جمَّعنا النضال ع النصر |
| مصر |
| مصر |
| مصر |
| باغزلك في توب النصر |
| ما تستغربوش |
| كانت أكيد |
| لحظه زي الحلم ما بتحصلش |
| لكن الأكيد |
| إن اللي اترسم فوق الوشوش |
| كان زي شعلة ضيّ |
| كان التاريخ الحيّ |
| ونبض التاريخ الجاي |
| من فضلكم |
| ارموا غصون الورد |
| شيلوا هدوم الحزن |
| يا كل الناس البني أدمين في كل جهات الأرض |
| أقفوا دقيقه حداد |
| رَاحُم ولا رجعوش |
| راحوا يجيبوا نهار الدنيا |
| راحوا، عيونهم فيها نهار |
| يا كل الناس البني أدمين في كل جهات الأرض |
| أقفوا دقيقه حداد |
| بنقف لهم مدى الحياه |
| نقف وإحنا حاضنين السلاح |
| للشهيد |
| اللي استشهد من زمان |
| واللي استشهد النهارده |
| للولاد |
| اللي راح يتولدوا من جديد |
| للزرع اللي اتحرق |
| للغيطان اللي دبلت |
| والغيطان اللي ح تزهَّر |
| كلهم .. واقفين لهم .. مدى الحياه .. |
| مش بس دقيقه. |
| لو رصاصه |
| رصاصه أحمي حبيبي |
| وطني حبيبي |
| من فضلكم |
| يا كل الناس البني أدمين .. يا شايلين ع الكتف سلاح |
| الجرح صباح |
| وبيطلع منّه المستقبل |
| حاضن في عيونه الخير .. والأفراح |
روابط مفيدة
الشعراء:
الأعضاء:
زوار اليوم:
الزوار:
أقسام البوابة
تواصل
