عناوين ونصوص القصائد   أسماء الشعراء 
شعراء العامية في العصر الحديث > مصر > عبد الناصر حجازي > عفار

مصر

مشاهدة
1391

إعجاب
0

تعليق
0

مفضل
0

الأبيات
0
إغلاق

ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك

إرسال
انتظر إرسال البلاغ...

عفار

نفّضت نفسي من العفار
مالقيتش تحت عفاري برضه الا العفار،
وريش .. وردم .. وكوم هدوم
فقلعت كل هدومي والآخر لقيت ...
ما فضلش مني ...
غير يادوب اللي اتقلع
ف عرفت إني ..
كنت لافف نفسي في شوية مفيش
سنين كتير مرت وانا ..
بانظر لنفسي في المرايا القي الضباب ...
مانعني م الرؤية ومفيش فوق الإزاز ...
غير نمنمة،
أعمل لنفسي إشاعة تحت بنفسجية ...
برضه ما تبيّنش غير حفنة عفار،
وضلمة بتأكد خطورة أزمتي
أخاف قوي،
وارجع بضهري لحد ما اخبط في الفراغ،
والقي الحقيقة اتمددت تحت الرماد،
وسؤال شرس ...
يمسكني من ياقة القميص ويهزني:
لما انت م الأول عفار ...
طب ليه ما وجهتش لنفسك من زمان نفخة ...
وريّحت الوجود من أزمتك؟
حطيت لساني في الجراب،
وبلعت كل الاجوبة
عشان لقيت الاجوبة برضك عفار
دخلت قوضتي وابتديت ...
أبص تاني ف خلقتي،
وانفخ قوي ... انفخ قوي
بعترت في القوضة العفار،
وخرجت افتش عني خارج هيكلي
بس اتفاجئت بالمطر،
والمية عوّمت العفار،
والأرض شدتني ف شقوقها الغويطة،
واتلقيت ...
صورتي اللي تايهة معلّقة ف كل الشقوق،
ف عرفت إني رجعت للبيت القديم .
عبد الناصر حجازي
بواسطة: محمد أسامة
التعديل بواسطة: محمد أسامة
الإضافة: الثلاثاء 2007/07/03 02:21:31 مساءً
إعجاب
مفضلة

أضف تعليق

يجب تسجيل الدخول أو الاشتراك أو تفعيل الحساب اذا كنت مشترك لإضافة التعليق


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com