عناوين ونصوص القصائد   أسماء الشعراء 
شعراء العامية في العصر الحديث > مصر > عبد الناصر حجازي > السحابة لسه فيها سنين شتا

مصر

مشاهدة
1133

إعجاب
0

تعليق
0

مفضل
0

الأبيات
0
إغلاق

ملحوظات عن القصيدة:

إرسال
انتظر إرسال البلاغ...

السحابة لسه فيها سنين شتا

إلى … من استمد الوطن من جسده المشلول حرية الحركة
الشهيد أحمد ياسين
محرّكات تفكيرى عطلت …
لمّا حتّة لحمة من جسمه القعيد ..
نطّت … في عيني،
وامّا مخّه …هدّ سور الجمجمة،
وما عادش فاضل منه غير …
لحية، و عين،
وحتّة من قورته و علامة …
للصلا
ذهنى ابتدا … يرجع لبيته،
وانحنيت .. عالصورة ابوس …
دمه اللى بقّع …
فوق ملاية … إحساساتى
يا ترى ..
مكتوب لى اشوف … موتة عمر …
لكن فى جسم أحمد ياسين؟
خارج من الجامع …
ولسه ملايكته حواليه،
ولسه الفجر بيعكّز على ..
كتف الآدان
واما الضمير …
زحفت على حيطانه الديدان..
اتحالفت الشياطين على …
دبح الملاك،
دبح الكسيح اللى رفض …
يمشى على … رجلين عدوّه
ما انت يا احمد …
كان لابد انك تموت..
عشان تأكّد للوطن …
إنك من الخلفة الحلال،
وتشيل خطايا اللي احتموا في الخوف،
وتثبت للتاريخ أن الوطن ..
ياما ها يقعد في الصوان ..
ياخد في أحبابه العزا،
وألف رنتيسي و ياسين ..
هيسلّموا لبعض الكفن
طول ما التتار واقفين على ابواب المدن ..
وعروشنا رهن الاحتلال ..
والدم شلال الوطن
بس الجميل انك تشوف ..
الدم بيخصّب تراب الأرض و بيطرح عيال
عيال بطعم الشهد و الموت اللذيذ،
عيال بتصعد للسما بزفة و مواكب
واللى هيراقب سمانا ..
يشوف غمامة كبيرة زاحفة على الوطن
وعشان كده ..
لابد نبحث عن مظلة
لا السحابة ..
لسه فيها سنين شتا
عبد الناصر حجازي
التعديل بواسطة: محمد أسامة
الإضافة: الأحد 2007/07/01 08:54:36 مساءً
إعجاب
مفضلة

أضف تعليق

يجب تسجيل الدخول أو الاشتراك أو تفعيل الحساب اذا كنت مشترك لإضافة التعليق


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com