عناوين ونصوص القصائد   أسماء الشعراء 
شعراء العامية في العصر الحديث > مصر > عبد الناصر حجازي > روحي آيلة للسقوط

مصر

مشاهدة
1190

إعجاب
0

تعليق
0

مفضل
0

الأبيات
0
إغلاق

ملحوظات عن القصيدة:

إرسال
انتظر إرسال البلاغ...

روحي آيلة للسقوط

روحي آيلة للسقوط،
والشروخ اللي في جداري ...
كل يوم بتمدّ لما حصلت أطراف ضوافري،
واتحاصرت بكل تجار الفرايا والهدد
في انتظار لحظة سقوطي المدهشة،
وانتشاري في السما شويةغبار
كل يوم باشعر دبيب الزلزلة،
كل خطوة تهز فيا اربع حيطان
ف ابدأ امسك فيا جامد،
واجري واتعلق في روحي
تنتشلني من المزاد،
وانتشلها من السقوط
واكتم الآهة اللي بتراود مشاعري ع الصريخ ...
كل ما اقطع لحمي ارمّم بيه شروخي،
كل ما اخطف روحي من إيد الهدد ...
واجري بيها،
ويطاردني الاهتزاز،
ويساومني ع السقوط،
واتفاجئت بشيئ قتلني ...
لما باقلع مرة جلدي ....
لقيتني شايل جوة مني حد منهم ...
من مقاولين الهدد
شفته فين؟ شفته فين؟
وابتديت اتذكره ..
أيوه هو ..
كل ما امشي في حتة أشوفه يبص لي،
واخاف انا اتامل عينيه ...
لا يخطفوا مني البصر
فاهرب واسيب له شوارع العالم،
واكوّم نفسي واتدحرج في شرخ،
ألقاه في قلب الشرخ قاعد في انتظاري،
كل ما اسكن حتة يطلع هو جاري
نظرته ... بتهزني،
سحنته ... خليتني اآمن بالخرافة،
واما تخبط عيني ف عنيه الإزاز ..
اتجاهله واعمل نفسي ميت،
أستخبي ف نفسي واهرب من عنيه،
واصرخ في سري: ما اعرفوش
والنوبادي لما شافني ...
جرّني لقسم البوليس،
وقام مقدم ضدي دعوي ادخل في طاعته ..
لأني لسه ف عصمته
واما قاللي القاضي روح ارجع لصاحبك ..
صوته حطم فوق دماغي كل جدران العدالة،
وقلت: آسف ... ما اعرفوش
الحرس بإشارة واضحة حط في إيديا الحديد،
والشهود اتحالفوا ضدي وقالوا فعلاً هو صاحبي
واما حققت ف وشوشهم ...
اتلقيتها وشوشه هو،
القاضي هو،
والحرس هو .. ولقيت ان العدالة برضه هو
قمت صارخ في الوشوش المستعارة:
مش راجع له ... مش راجع له
عشت طول العمر راكع بين إيديه ...
ما اتلقيتش ف شرعه جنة،
كلت تفاحه المحرم،
انتهك روحي وعايزني اصلي له ونا ....
متوضي من نهره الجنب،
إحتلني،
حط إ سمه تحت صورتي،
حط صورته فوق ملامحي
إستلفني ورافض انه يردني
مش راجع له ... واسجنوني
يمكن القي ف سجنكم .... حريتي
عبد الناصر حجازي

من قصائد ديوان بنعيش بنص روح الصادر عن الهيئة العامة لقصور الثقافة بمصر
التعديل بواسطة: محمد أسامة
الإضافة: السبت 2007/06/02 06:11:05 صباحاً
إعجاب
مفضلة

أضف تعليق

يجب تسجيل الدخول أو الاشتراك أو تفعيل الحساب اذا كنت مشترك لإضافة التعليق


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com