إبلاغ عن خطأ
ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك
انتظر إرسال البلاغ...
|
نفسى أروح للحسين |
أرمى روحى فى حضنه واتمدِّد |
واغسل جروحى بدمعتين |
كان فيه وطن فى حارتنا واتبدِّد |
كان فيه جناين عشق ساقيها الندى |
دلوقتى شايف أمَّه بتعدِّد |
والدم طال العتب |
وعيال بلا أحلام بتشيب وبتقدِّد |
نفسى أروح للحسين |
والدم طازه والدموع دافيه |
والحسره بتنقط من الشباك |
والليل بيغسل بالضلام المشهد |
وبنات بتحبل بالصراخ والخوف |
متعشره بالقهر وبتولد |
فينك يا سيدنا على |
فينك يا سيد الشُهدا بترحم عليك |
يابو عمه خضرا ولاسه بتجرجر |
اوعى تقول لى المقدَّر |
عايم فى قلب المهزله |
شايفنى فتفوته بتعرج جنب سور الوهم |
ماشى وبتعكِّز |
حتى النخيل عجِّز |
الطيارات ما تقولش طير أبابيل! |
والنيل كمان اتصفى |
انا شفت نعشه ماشى فى الزفه |
جوه المقام بيفرقوا القرفه مع الأحزان |
ماعدش باقى قبور |
غير اللجوء للنور |
ومين عليه الدور |
والأوليا نايمين فى ياقة قميصى |
كل شىء مشروخ |
حتى القلوب اللى حلمت |
ببلاد وناس وآيات رايحه على الجنه |
مجنون ياوقت جبان ولا بتتجنى |
الكندى مسنود على كتف الفارابى |
والبصره بتنادى على السياب |
مين اللى سك الباب فى وش النبى |
اطلع بقى وقولهم |
انا هنا |
اثبت لهم انك صحيح |
مش تاريخ صدا على طرف السكك |
آدى التاريخ قاعد بيتشمس .. |
فوق المصاطب . ع الدكك |
كل حاجه بتربكك |
حتى الوجع |
مين اللى جابنا هنا |
والأسئله مبريه فى طروف الكهوف |
كل العيون المبصره عميت |
ما بقتش قادره تشوف |
كبرت شاشات العملا بالأموات |
والبير بيوسع بالرماد والخوف |
وكلامنا أعجز من حجر مركون |
وكون بياخد نفسه بالعافيه |
كان لسه نايم فى حضنها |
كات لسه حلمة صدرها دافيه |
وفى حضنها بيناغى ويتهته |
ماكانش فاهم إنها خرابات |
وان احنا أمه عبيطه من الأموات |
عشان كدا سلم عليها وابتسم للريح |
كأنها كانت بلاد من وهم |
عدت وراحت زى رمشه فى حلم |
صراخ بيحبل بالصراخ |
وصيدا بتشاور على الجاحظ |
ماشيه بتتغمز على الماشيين |
كل حاجه محاصرها الوجع |
وانت نايم يا حسين |
ما خلاص اتعرت آخر ورقة توت |
والخصيان .. الجديان اتلموا |
والحاوى بيرقص بالنبوت |
على إيه!! |
على جثث اولادى وأحفادى |
والدم بيغسل فى شوارع بيروت |
والشعرا الأزلام .. الأنعام .. الأغنام |
بيعبوا الليل فى الحرف |
وبيكتبوا طاش رشاش ع الخيبه |
أسيادهم بتحركهم بريموت |
يا ولاد الوكسه والنهجان ورا كدب الحبر |
وجهل الروح اللى بيزحف زى كلاب الضلمه |
ورا السحتوت |
الحاوى بيلعب بالبيضه |
ويقول للتعبان بسم الله |
والنور متكسح ع الميضه |
لسه بيشهق ويقول بيروت |
وكلاب الأرض الجُرب .. الخونه |
أُمات شنبات بيعبوا الليل |
فى أزايز الموت |
فين ضريحك بندهك |
حط ايدك فى ايدى |
النار بتاكل وريدى |
وبيصرخ الحلاج |
ليه الضلام محاصر روحنا |
فى كل الأماكن |
والعيال بيجروا أشلاءهم وراهم |
ماشيين فى صحرا آخرها جوانا |
مشاليل فى ليل وحدانى بيعيط |
وانا هنا بصرخ فى كفنى |
ماشى فى جنازه رايحه للمجهول |