عناوين ونصوص القصائد   أسماء الشعراء 
الشعراء الأعضاء .. عامِّي > مصر > أبو حجاج > نُص الليل

مصر

مشاهدة
94

إعجاب
0

تعليق
0

مفضل
0

الأبيات
0
إغلاق

ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك

إرسال
انتظر إرسال البلاغ...

نُص الليل

الليل نُصين. بين المغرب ومابين الفجر…
بين المجهول. ومابين الهدر….
يعنى بيمشى النُص الضلمه. يُجر ف ديله ساعات العاتمه فيولد بدر….
نُص الليل الاول صالح .دايما للمعقول….
ناس خارجين يتعشو ف حفلة. وناس بتدمس طبق الفول…
ناس بتصلى الفرض جماعه. وبعده بساعه تنام على طول…
كل أملهم يصحو يصلو الفرض التالى…
وعم حسين واحد من دول …
ناس بيقضواو الليل ف تسالى…
فيلم بيخلص.ف بيستنو إعادة حلقة سعد الدالي…
نُص الليل كان بالنسبالى…
قعدة قهوة ولعب الطاوله…
مش عارف ليه ديما بختار العب بالاسود…
باحسه مريح. دايما واضح. وملوش فى الغش…
ارمى الزهر يجينى الدوش…
ابُص ف ساعتى واخاف النُص العاتمه يخش…
ارمى كمان فيجينى الياك…
بيفكرنى بحظى تملى. عك ف عك…
تيجى دوباره اتنين بالدو…
دايما مقفوله معايه خانتها…
دوسه جارتنا صاحبت واحده شمال ف خانتها…
ارمى الزهر فيجى جوهار…
ياما اليل شايل اسرار…
حاجات بنشوفها فى حكم العار …
طلعت عادى مادمت ضاربلك قرش حشيش…
شكلى بجد طلعت حمار…
انا مستنى الدو و البيش…
ولا حاجه غيرها تخرجنى…
نُص الليل يحلى التهبيش…
ارمى الزهر يدور ويلف ولاا الدراويش….
اول مره اشوف الزهر بتاع الطاوله بدون ارقام. و يقولى مفييش…
قومت وقفت وقولت احتج…
مد ايديه على كتفى وقالى. أهدا شويه. الشاي السخن شرخ المج…
لاقتنى هتفت وقولت يعيش…
زهر الطوله بيدى لمين غير الالاديش؟؟…
ليه مستكتر على الحرافيش الدو والبيش؟؟…
لسه بعيش.. فى نهار امبارح…
لسه خيالى بصحبة نوره الطارح سارح…
مش مستوعب ابدا فكرة أرض الورد.. طارحه موالح!!…
بين القهوه وبين البيت تلات دكاكين. وسبع خطوات…
مسافه مخيفه بتفكرنى بحوده الطيب…
حاول فيهم يحيى النخوة… ..
بطعنة مطوت راجح مات…
الليل فات. منه التلتين…
فاضل تلت.....
ليه حاسس دايما لما قفلت الطاوله....
انى استعجلت….
ساعات جوايا حاجات بتقولى....
لما انت مالكش ف لعب الطاوله....
ليه بس نزلت؟!! ….
قومت مشيت...
فى السِكه قابلنى عم حسين…
زغلل عينى بنور السبحه. اللامع…
جات فى دماغى فكره مخيفه…
تلح عليه بحاجه سخيفه….
فكرة عم حسين لو مات..
مين هيشيل مفتاح الجامع؟؟….
مين هينبه كل الشارع.....
يطفو النور مع صوت الفجر…
وكله بيعمل زى حلاتى. بحاول انام واعمل مش سامع….
كلنا راجح.. كله بيهدر دم النخوه…
احنا وراجح.. اصلا أخوه…
احنا وهو اعتدنا الغدر…
هو بمطوه اغتال محمود….
واحنا بنومنا اغتالنا الفجر …
أبو حجاج

اجتماعيات
بواسطة: أبو حجاج
التعديل بواسطة: أبو حجاج
الإضافة: الخميس 2020/04/09 06:32:56 مساءً
إعجاب
مفضلة
متابعة

أضف تعليق

يجب تسجيل الدخول أو الاشتراك أو تفعيل الحساب اذا كنت مشترك لإضافة التعليق


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com