عناوين ونصوص القصائد   أسماء الشعراء 
الشعراء الأعضاء .. عامِّي > السعودية > حسن عامر آل عيسى > يالله يالمعبود يارب الارباب

السعودية

مشاهدة
2513

إعجاب
0

تعليق
0

مفضل
1

الأبيات
0
إغلاق

ملحوظات عن القصيدة:

إرسال
انتظر إرسال البلاغ...

يالله يالمعبود يارب الارباب

يالله يالمعبود يا رب الارباب
يالواحد الخالق عزيز الجلالي
اللي رجاك ويطلب رضاك ماخاب
ويوم الحشر ماغير ضلك ظلالي
يسمع دعا خلقه وليمن دعي جاب
ونصر نبيّه في نهار القتالي
في بدر والخندق ومؤته والاحزاب
مابقي لأهل الكفر عزّ او مجالي
يامرسل محمد الى الخلق بكتاب
أنك تنجينا بيوم السوالي
يومٍ تضيع به الهقاوي والانساب
وكل البشر حضّارٍ أول وتالي
في ماقفٍ ماللبشر منه مهراب
من شدته هيلت كبار الجبالي
ولاتنفع التوبه بوقته لمن تاب
إلا العمل عبر السنين الخوالي
يومٍ عبوسٍ مالنا عنه مجناب
والريق وسط الحلق ماله بلالي
الرجل ينسى ابوه وامه والاقراب
ويقول وين ألقى نجاتي لحالي
من قوة الأهوال الأطفال شياب
والكل جاله بالمصير انشغالي
المؤمن الصادق يقابل بترحاب
ويدخل جنانٍ تربها مسك غالي
ويسكن قصور وبالحرير البس ثياب
ويدخل نعيمٍ مالوصفه مثالي
والكافر الفاجر يقيّد بالاعقاب
ويرمى بنارٍ في لظاها اشتعالي
واذا نضج جلده يبدل والاعصاب
ولا ينفعه لو يفتدي بالعيالي
ياويل من طبعه منافق وكذاب
طاع الهوى والنفس واهل الظلالي
وياويل نقّال النميمه ومغتاب
يوم الحساب وكشف ستر الخمالي
دنيا العنا هذي تقلب تقلاب
هاضت هجوسي الراس مما طرالي
والوقت هذا وقت خاين ونهاب
تغيرت حتى فعول الرجالي
لاذناب صارت روس والروس الاذناب
والناس ما تفرق حرام وحلالي
ماعاد يفرق صقرٍ وبوم وغراب
كلش طيور تحوم روس العوالي
لها مناقيرٍ وريشٍ ومخلاب
والفرق بيّن في نهار الفعالي
واحد اذا جاء الجد للصيد جلاب
وواحد على الجيفه يحط الرحالي
والناس مثل الأرض وديان وهضاب
وناسٍ ذياب وناس مثل الرخالي
والبعض كلمه زايده مالها اعراب
مثل الهباب يطير عند النخالي
نصيحتي يامن يدور للاصحاب
احرص على صحبة كرام السبالي
ترى الوفي للضيق ماهو بهيّاب
ولاهو من اللى يحسبون الريالي
ولاّ الردي في ساعة الضيق ينساب
ماهو من اصحاب اليدين الطوالي
واحذر من اللى للسواليف حطاب
مايعرف ايش الهينه والجزالي
تلقاه للحوم الرجاجيل قصاب
وعند الحقيقه مايساوي نعالي
حرب القريب مطيع للناس الاجناب
يصبر على الزلات صبر الجمالي
ولا تأمن الحية ولا تأمن الداب
أذهن لخطو الرجل فوق الرمالي
وتمت وصلى الله على سيد الاعراب
محمد المختار عدّ الخيالي
حسن عامر آل عيسى
التعديل بواسطة: حسن عامر آل عيسى
الإضافة: الجمعة 2016/09/02 01:41:48 صباحاً
إعجاب
مفضلة
متابعة


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com