عناوين ونصوص القصائد   أسماء الشعراء 
الشعراء الأعضاء .. عامِّي > مصر > جمال مرسي > فاتت سنة

مصر

مشاهدة
1680

إعجاب
0

تعليق
0

مفضل
0

الأبيات
0
إغلاق

ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك

إرسال
انتظر إرسال البلاغ...

فاتت سنة

فاتت سنه
بمناسبة مرور عام على الغزو الأمريكي للعراق
فاتت سنه
والديب ما زال يا خلق ينهش لحمنا
وبيسفك الدمّ الطهور اللي جرى
فوق أرضنا
في البصره .. في بغداد .. في كل الأمكنه
في الصوم و في الأعياد .. و كل الأزمنه
***
فاتت سنه
والديب بيعوي في الفضا
كمم عيون الناس و جذ الألسنه
والسُّم حطه في العسل
والبتزا جابها عندنا
وقعد بكل غرور غبي
حاطط رجوله ف. وشّنا
لمّا شرب من دمّنا
***
فاتت سنه
ويجوز تمر الميت سنه
والديب هيفضل زي ما هو
ف. الضلال و الشيطنه
علشان مفيش فارس همام
نفسه عزيزه و مؤمنه
يصرخ بعلو الحنجره
وبألف لا للهيمنه
***
كل الفوارس زي ما تكون انتهت
واتغيّبت
بتلاته سنتي من سرنجه مُسكّنه
نصل السيوف صابه الصدا
صابه الكسل
علشان مفيش فرصة عمل
واستبدلوه بالميكنه
والميكنه ....؟؟
فيديو و دش و ليل طويل
بيضيع في لحن و دندنه
صوت البنادق زي ما يكون اتكتمْ
وما عدش غير صوت الغُنا
أمراض خطيره و مزمنه
***
فاتت سنه
والديب بيضحك من صميم القلب
يخنق صبحنا
ويبدل الحلم الجميل اللي رسمنا كلنا
من قلبنا
واحنا مع الأسف الشديد
ما زلنا منتظرين صلاح
وبلال يأذّن في الصباح
والمعتصم يطوي الرياح
علشان يحقق حلمنا
اللي فقدناه كلنا من ضعفنا
ويحطم الديب الجبان اللي بقى
هو الفتوه من فتورنا و جبننا
وعشان بعدنا عن طريق الحق
طحنا ف. بعضنا
وامّا اختلفنا و افترقنا
اتهزمنا كلنا
!!!..يا دي الهنا
مش برضه أشياء محزنه.؟؟
***
بغداد بلاش اليأس، حزنك حزننا
وبلاش دموع الحزن في ليل الضنا
وان كنتي منتظرانا يا غاليه بقولك إننا
محنش هنا
شيلي السلاح و اتكلمي
يلا انهضي .. يلا احلمي
لسه الأماني ممكنه
لسه الأماني ممكنه
جمال مرسي

شعر العامية
بواسطة: جمال مرسي
التعديل بواسطة: د. جمال مرسي
الإضافة: السبت 2006/12/02 10:25:49 مساءً
إعجاب
مفضلة
متابعة

أضف تعليق

يجب تسجيل الدخول أو الاشتراك أو تفعيل الحساب اذا كنت مشترك لإضافة التعليق


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com