عناوين ونصوص القصائد   أسماء الشعراء 
الشعراء الأعضاء .. عامِّي > مصر > عاطف الجندى > خمسة حارة الآخرة

مصر

مشاهدة
611

إعجاب
0

تعليق
0

مفضل
0

الأبيات
0
إغلاق

ملحوظات عن القصيدة:

إرسال
انتظر إرسال البلاغ...

خمسة حارة الآخرة

إلى روح صديقى عابدين مرسى
كان النهار مخنوق
وشمسه مدغمسه
ويونيه
خانق جتتى
ممنوع تبحلق فى السما
أصل الكسوف
مكتوب على
وش الحليوه المُغرمه
قالوا القمر
عدَّى عليها إتحجبت
***
قالت إذاعتنا وإذاعات الدِّول
اللى يبحلق
يتعمى
خافوا البشر
ماشى لوحدى والطريق
مليان حُفر
القطر فاضى
عدَّى جنبى
اللى ياما فيه ركبت
وكنت دايماً
باتحشر
***
جاى لك يا صاحبى
والحنين
عَمَّال ياخدنى لسكتى
رمل الطريق
عاشق لِلَمْسِة خطوتى
عشرين سنه
من صُغر سنِّي باعرفك
فين اللقا
متخبى ليه؟!
وسايبنى أقاسى ف وحدتى
فاكر يا صاحبى
لما كنا
تلميذين؟!
ياما كنت شاطر فى الغنا
كنت بتغنى لحليم
والحلم دايماً
ضمِّنا
وأنا كنت أقول لك
قول كمان
غنى يا صاحبى وطير بنا
للنجم
لجزيرة بعيدة
للخيال
خبَّط ونادى ع البيبان
صحِّى اللى ساكن
صدرنا
***
عارفك يا أبو حُمُّص
وعارف سِكتك
بين المزارع والغيطان
رُزَّك بيضحك للى راجع
يحملك
قُطنك بيتمايل عيدان
الفرحه وخدانى
وسابقه خطوتى
وف عزبة الجَرَادات رايح لك
يا اللى شاغل قصِّتى
القلب زاد النبض
والفرحه ف خدودى
والسِّن راسم ضحكتة
هاخدك فى حضنى
وأبوس عينيك
أمسك إيديك
خبَّطت بابك
جانى واحد مش عارفنى
قال لى عزِّل
راح لأبوه
خمسة حارة الآخرة!
***
من يوم ما مات
ساب لى دمعى
وذكريات!
***
عاطف الجندى

* من ديوان ( العيون السود ) الصادر فى يناير 2012 عن سلسلة منتدى عاطف الجندي الأدبي
بواسطة: عاطف الجندى
التعديل بواسطة: عاطف الجندى
الإضافة: الخميس 2012/02/16 12:05:08 مساءً
إعجاب
مفضلة
متابعة

أضف تعليق

يجب تسجيل الدخول أو الاشتراك أو تفعيل الحساب اذا كنت مشترك لإضافة التعليق


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com