عناوين ونصوص القصائد   أسماء الشعراء 
الشعراء الأعضاء .. عامِّي > مصر > عاطف الجندى > بطل

مصر

مشاهدة
815

إعجاب
0

تعليق
0

مفضل
0

الأبيات
0
إغلاق

ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك

إرسال
انتظر إرسال البلاغ...

بطل

***
واقف لوحدك فى الميدان
بتحارب الخوف الجبان
وانتَ يا صاحبى
أجدع جدع
مفطوم وعازم ع النضال
جبال جبال
بتشيلها وحدك
مِش خِدعْ
يا صبر قلبك ع المحن
الجرح نازف
وانت بتقول الوطن!
***
آه يا وطن
آه يا وطن يااللى إحنا بعناك للكلاب
بارخص تمن
وف دير ياسين
وف حيفا وف يافا وجنين
الجرح بينادى الكفن!
فين الوطن؟!
والكل سابك تتحرق
بين المدافع والبارود
قلبك فولاذ
ما يخافشى
من مليون شقى
بتطهر البيت المقدس
من قُريظه والنَّضِير
فيك ريحه من ريحة النبى
نفس العيون السود لأخويا
والعقال جدِّى
والطيبة دى
طيبة أبى
ماسك باروتك للخلود
بتقول نعود
نرسم دمانا ع الحدود
بتصحى مِيتْ مليون عَفي
***
يا فجر
إلبس توب نهار
واترك سكون المقبره
سيبك من الأحلام
وخاصم حييها
من شط دجلة لعطبرة
شوف اللى كانوا زمان إوَلْ
بقيم ورا
***
يا حلم وسط الليل
بيحبى للأملْ
بين الشطوط
محتار وحيدْ
بتصارع الموج العنيدْ
والبحر يا صاحبى ضياع
والصحبه غرقم كلُّهم
فى بحر نفط مالوش قرار
والعم سام
فارد جناحه
ضمُّهمْ
مِشْ بعضهمْ
لأ كُلُّهم
رضيم يعيشوا كالخراف
واشجع شجيع
من صَفُّهم
بيقول هانشجب
بس من تحت اللحاف!
***
ما عرفش ليه يا صاحبى
بتخونى دموعى
لما باشوفك فى الصور
أو باقرا عنك
يوم خبر
بالقى تعابير الزمان
حافره حكايا ف سحنتك
بالقى الآلآم
يا صاحبى عارفه سِكتكْ
وانت بتشحت دولتكْ
***
يا فجر نام الليل على راسك
وضاعت بسمتك
رعشة شفايفك فى الكلام
بتقول لى أنا خاين
لإنى رضيت أبيعك
من زمان
يا اللى بتحارب لوحدك
بالحجاره
نجمة الزيف والشيطان
يا اللى بترجع صلاح
من بعد غيبته للزمان
لسَّه يا صاحبى الليل طويل
واحنا معاك
حتى نلقى ف يوم
أمان
بس عاوزين السماح
سامحنا يا صاحبى
على النوم الطويل
والثورة من الجسم الهزيل
واطول طويل
يا صاحبى بيقول السماح
مهما شُوقنا ف يوم يطول
لابد هيبان الصباح
لابد
هيبان
الصباحْ
***
عاطف الجندى

* من ديوان ( العيون السود ) الصادر فى يناير 2012 عن سلسلة منتدى عاطف الجندي الأدبي
بواسطة: عاطف الجندى
التعديل بواسطة: عاطف الجندى
الإضافة: الخميس 2012/02/16 11:41:03 صباحاً
إعجاب
مفضلة
متابعة

أضف تعليق

يجب تسجيل الدخول أو الاشتراك أو تفعيل الحساب اذا كنت مشترك لإضافة التعليق


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com