إبلاغ عن خطأ
ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك
انتظر إرسال البلاغ...
|
*** |
قالوا وقالوا ف حسنك ياما |
وانتِ يا سمره |
بلون النيل |
لون القمح الأخضر طالع |
يطرح جيل |
من بعد الجيل |
توبك خُضْره |
وويا اصحابك |
زىِّ الغصن لغصن |
يميلْ |
أما أعدائك |
فيا طول ليلهم |
مهما يكونوا يشوفوا الويلْ |
*** |
فاكره يا أمى؟! |
فاكره يا أمى التار البايت؟! |
فاكره أحزان؟! |
لما خانوكِ أولاد الهرمه |
وعضوا ايديكِ |
شِمال ويمينْ |
سينا البكر خدوها سبيه |
ف لحظة غفله وغمضة عين |
*** |
لما ناديتِ لكل ولادك |
جُولكْ |
ياخدوا بتار العيله |
شرف الأرض |
دا زى العِرضْ |
والله ما نمنا عليه |
لو ليله |
ويوم السادس من أكتوبر |
غنى المدفع |
لما أولادك |
عبروا الخوف للضفه التانيه |
عِزْ الضُّهر |
ف شهر الخير |
صوت الضرب ف كل مكان |
ناره بتشوى أولاد الإيه |
عبد العاطى |
عارفه يا أمى |
ابن النيل والطين المصرى |
فلاح عارف |
معنى العِرض |
عرقه بتشرب منه الأرض |
كان ويَّايا |
ف نفس كتيبتى |
زيِّى |
ف شكلى و لونى و طيبتى |
*** |
لما عبرنا الضفه التانيه |
إتغيرنا |
إتحولنا بقينا أسود |
صوت الباطل |
منا يولِّى |
وصوت الحق ما غيره يسود ْ |
عبد العاطى الجو |
بيضربْ |
عبد العاطى الأرض |
بيضربْ |
عبد العاطى البحر |
بيضربْ |
إضرب، إضرب |
إمسح تارى و عارى و خيبتى |
خلى فيران القرصان الأعور |
يدخلوا تانى |
جوَّا جحورهم |
خلى كلاب الست مائير |
يهزوا ديولهم |
لجل خالتهم |
مالكه العالم |
تبعت سرب، عشان ينقذهم |
والله ما فادهم |
والله ما فادهم |
كان المارد برَّه و حالف |
عمره ما يرجع |
تانى القمقم |
نصر بدمِّى يا أمى |
أنا كاتبه |
كل أولادك عبد العاطى |
أحمد |
جرجس |
مسلم |
مينا |
راح تلاقينا |
ف وقت الشِّدَّه |
ليوم الدين |
عمرنا ما نطاطى |
*** |
يلاَّ يا أمى |
قومى ارفعى راسك |
كل ولادك دول حرَّاسك |
يا اللى جمالك آيه يا بلدى |
وأحلى ما فيكِ |
شهامة ناسكْ |
أحلى ما فيكِ |
شهامة |
ناسك |
*** |