لا تقصر الفنجال سق لي دلالك |
انا دخيلٍ يااريش العين بحماك |
مير البلا لو قلت لي روح مالك |
عندي مكان وتخذل اليوم من جاك!! |
خيّلت برقك ثم تلاشى خيالك |
ماهل مزنك يوم شفي على ماك |
ماهمك اللي من عذابه عنالك |
اللي بقى بالعسر واللين وياك |
أتعّبت زملي مع مواطي جمالك |
ما بين صخر وبين مسنون الأشواك |
قلبي يبا المرباع لاشك هالك |
اطرد سرابك مع جراهيد مضماك |
اسقيتني علقم وغيري زلالك |
حطمتني وانا اللذي كنت مرساك |
لملمتني بعثرتني في مجالك |
قربتني وابعدتني من سواياك |
قتلتني مابين طيفك وحالك |
غسلتني بدموع من ذاق فرقاك |
كفنتني من جور وقتٍ هنالك |
قبرتني في صالي الجمر بيداك |
حتى الدعاء ماقلت قلبي دعالك |
ولابه دموعٍ يوم قفت بك اخطاك |
وقت العزاء ماقلت قلبي عزالك |
دقيت طبلك واستمريت بغناك |
واليوم عطني من الوفا مابدالك |
وارحم جروح اللي من الهم ينخاك |
وان كان ضاعت قسمتي/راس مالك.. |
..عندي وداع وجاير الوقت بداك |
بجمع شتاتي وانثره في وصالك |
واشطب وصالي من معاليق ذكراك |
وابعثرك من جمع قلبٍ صفالك |
وأفَتّح جروحك من ادناك لقصاك |
والفرحه اللي تحتضنها شمالك |
ياجعلها تفقد تراحيب يمناك |
فالٍ طواني جعله اليوم فالك |
اقرب من الحنا على كف يسراك |
أقسم بربٍ صورك في جمالك |
ثم خصني بك بين ذولا وذولاك |
ماقلتها كره(ن)!! ولكن هبالك |
أثر على عقلٍ من الصعب ينساك |