إبلاغ عن خطأ
ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك
انتظر إرسال البلاغ...
|
العالم سيرك كبير عِبرى |
جمهوره جميع الكون |
ولأن جدودك كانوا قرود |
اعمل ميمون |
قوم يالّه اتمختر واتنطط |
واتحزم بالشرق الأوسط |
وارقص ياشارون |
خليك سفاح زى عوايدك |
اوعاك تسمع مرة رويدك |
سلفنا سلام كله استسلام |
واقبض من أرواحنا فوايدك |
والعب ياشارون |
جات ع الطبطاب ياسلام سلّم |
أوراقك لشارون واستسلم |
لملم يا شارون كل الأوراق |
من هذا الحين ورجوعاً لمعاهدة كارتر |
حط الأوراق فوق بعضيها |
فك حزامك وعليها طرطر |
وإن قال لك غزة وأريحا |
شد لها سيفون تخفى الريحة.. |
واوعى تفكر |
والعب يا شارون |
ولّع كبريتك قوم واجرى |
د الأرض بتتكلم عبرى |
احرق ف القدس الشرقية |
واحرق ف القدس الغربية |
وادخل بجنودك ع الأقصى |
ولّع ف حصيره وجدرانه |
ولا سيدنأ نيرون! |
سكت برصاصك من رفضوا |
أو قاموا هناك ولا انتفضوا |
حتى الماشين ساكتين أمنين |
خلّص واضربهم بالمرة |
وإن شالله يموت مليون درة |
وإن قالوا سلام كرر لعبك |
وإن قالوا حروب سلّم لى على الأرض الحرة!! |
وإن قالوا يابوش |
قوم حلّق حوش |
غنّى لهم نهاوند وسيكا |
راح يعمل إيه المخفى سى بوش |
دا حيالله رئيس أمريكا!! |
أراجوز ف إيدكم لما تقوله: اتكلم |
يبقى قوام بربنط |
ولما تقوله يهسّ |
ينزل فوق سهم الله |
عبد المأمور والأمر بتاعه ف إيد مولاه |
لو سيده يغنى يقول: الله |
على صوت مولانا وصيته |
وإن رفض العالم كله غُناه |
يستخدم حق الفيتو!! |
وإن شالله يغور الكون |
وارقص يا شارون |
محمى ف الرايحة وف الجاية |
قوم دوس ع الدول العربية |
واوعى تخلّى |
يا ورد ع الصحبة يا للى |
وإن سلام زى العادة |
شربهم ف القهوة السادة |
وسلامهم عند أم الّلَلِّى!! |
اوعى تظن كلامى هزار |
دا أنا فرحان بيك قوى يا شارون |
طوح فينا يا شرشر فوق |
وكمان فوق |
وارمى الناس من فوق الفوق |
لما تكون النزلة قوية |
لازم كل الناس دى تفوق |
بس لعلمك لازم سيركك يوم ينفض |
طول ما إيدين ال اولاد مليانة بطوب الأرض |
بكرة هتجرى |
وورا الصخر تروح متخبّى |
بس ساعتها |
راح يتنصب السيرك العربى |