عناوين ونصوص القصائد   أسماء الشعراء 
شعراء العامية في العصر الحديث > السعودية > محمد الأحمد السديري > سيل حدر مع وادي غير واديه

السعودية

مشاهدة
1200

إعجاب
0

تعليق
0

مفضل
0

الأبيات
0
إغلاق

ملحوظات عن القصيدة:

إرسال
انتظر إرسال البلاغ...

سيل حدر مع وادي غير واديه

شي بقلبي ياملا حاير فيه
شي تحير به العقول الفهامي
اخفيه بفوادي ولا ودي ابديه
وادور الخيرات شرق وشامي
احترت به ماشفت شي يحاليه
واليوم ابنشد عنه مانيب كامي
سيل حدر مع وادي غير واديه
مدري حلال ماه والا حرامي
كانه حلال وجايز شرب صافيه
وش حلله يا مفسرين الحلامي
هاتو تفاصيله وهاتو معانيه
نبي الدليل اللي عليه الكلامي
نبي دليل يفهم الدرب ماشيه
يمشي به التايه بليل ظلامي
يمشي به التايه ويقدي مواطيه
ويشرب قراح الما اليا صار ضامي
لاشك هجسي يوم خلا مماشيه
انه حرام ومنه زود الاثامي
احرم من الزقوم مره وحاليه
وشربه على الظامي يزيد الهيامي
الله من قلب همومه تقزيه
تدك به مثل الجراد التهامي
من مما جرا قامت تتله مشاحيه
تل الرشا من فوق هدف المقامي!
روابع قامت تصيبه وتخطيه
شاف الهوايل واختلاف الاسامي
ما يسمع الداعي اليا قام يدعيه
يعوم في بحر من الهم طامي
ما ينتبه للي بصوته يناديه
يزيد همه يوم كل ينامي
يشوف وقت ماعرفنا تواليه
وقت يشيَب من بسن الفطامي!
هذا زمان كاثرات بلاويه
والغيم يقلب فيه عج وكتامي
يابعد شرب الما على كبد راجيه
ما سيَل الغبرا زعوج الجهامي
انبيك يامن كلمة الحق ترضيه
اعطيك ما ينفعك وافهم مرامي
قصر يذلك لا تقابل مبانيه
خله عسى شامخ طويله هدامي!
خله عسى ما صاب اغادير يفنيه
يودع منازله الطويله رجامي!
لو زان مدخاله وطالت حواميه
شيَد على الخيبه قليل الرحامي
وحي يوريك المذله وتغليه
انا اشهد انك ميت القلب عامي
من لايودك لا توده وترجيه
ارفع مقامك ياعزيز المقامي
ارفع مقامك عن عدوك وتوذيه
ويلحقك من تركت رفيقك ملامي
حق الرفيق وواجبه لا تخليه
يلزمك مثل الوالدين الحشامي
اختر عزيز الجار والحق يعطيه
مادك به عرق المذله وطاريه
ومن قارب الاجرب بالامراض يعديه
عداوة تسطي باللحم والعظامي
درب السلامه بينات مماشيه
ودرب العطب يرث عليك اللكامي
ابعد وقلبك نازح البعد يشفيه
وتلقا عن الدار البغيضه مقامي
دار بدار وداعي الذل عاصيه
ولا تقبل الذله نفوس الكرامي
الذل موت حايمات ضواميه
عن مقعد بالذل عينك تراعيه
الموت عند الذل امان وسلامي
يرضى المذله من تردت هقاويه
والذل يجفل منه قلب العصامي
والعبد له رب عن الناس يغنيه
ولولاه ما صاب الهدف كل رامي
محمد الأحمد السديري
بواسطة: حمد الحجري
التعديل بواسطة: حمد الحجري
الإضافة: الجمعة 2015/09/18 03:54:19 صباحاً
إعجاب
مفضلة


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com