عناوين ونصوص القصائد   أسماء الشعراء 
الشعراء الأعضاء .. عامِّي > السعودية > لفى الهفتاء > حزم ما هو مثل حزم الظامي

السعودية

مشاهدة
1186

إعجاب
0

تعليق
0

مفضل
0

الأبيات
0
إغلاق

ملحوظات عن القصيدة:
بريدك الإلكتروني - غير إلزامي - حتى نتمكن من الرد عليك

إرسال
انتظر إرسال البلاغ...

حزم ما هو مثل حزم الظامي

جادت الأشعار حتى لو بخَل ملهمها
يوم اعدّي حزم ما هو مثل حزم الظامي
عن تعاليل الهوى والريم ومْتيّمها
السعير بخافقي والعاصفة بعظامي
واتنقّى من فرايد هاجسي وانظمها
لين تتعب بعدي القاب وكُنى واسامي
لو ماني رايد الجيلين ومْخضرمها
بس صفحات الزمن تحظن مداد اقلامي
يوم انادي بالحياة وهل خلا عالمها؟
ما سمعت من السنين الا حديث ايامي
وأمس مع ركبان قومٍ صحت يا مقدمها
ليه تتهمني وانا ما كنت غير مْحامي
لا تحسب ان الحروف المبهمة ما افهمها
بس صح لسانك وخذ ما ملاه الهامي
يا هلا بك باعرق بيوت الوفا واكرمها
وقدّم الحجة على ما تدّعي قدّامي
دامها يا هيه كلمة حقّ لا تكتمها
ذي يميني في يمينك والحسام حسامي
مثل ما ودّك والأمور ابدها واختمها
بس لا تنزل مقامك يالمقام السامي
كان لك جنبٍ متين انص العرب وادحمها
لو تموت اخير من جرح الخضوع الدامي
تعسر الأمجاد رجلٍ تاه عن سلّمها
ما تجي لك من يد المغمور والإعلامي
يا تقدّم للمهمة لا حكم ضيغمها
يا اعتزلها وغاية إقدامي تحثّ أقدامي
كم نصحتك قبل نار الغيّ لا تشعمها
يوم احطك عن خوالي في وجيه اعمامي
من سنين اسري معاك النايبة واجهمها
وهالسنة غايتك تكسب مشلحي ووسامي
ارتح وما لك وما للروس ومْصادمها
في نهارٍ به يبين الذيب والضرغامي
كان ما تكحل عيونك عزّ لا تلطمها
الرجال تبين فاليوم الخطير الحامي
لا تجيني في علومٍ باطلٍ معظمها
قدمك الرمح اليماني والحسام الشامي
كان بيمينك زمام المعظلات احكمها
او تريّح والسعد بعْصابتي وحزامي
والله اني لاقعد لهوج الدهر واحسمها
لين ما اركز في السفوح الناميات اعلامي
من يماري في سيوفه لك عليّ اثلمها
موقفٍ يستدعي قْطامي سليل قْطامي
ايه الأقوام احترمها بسّ ما اعظّمها
ولا سعيت لذمّ بيشي لجل عين تْهامي
من تطيب اثني عليها ومن تعيل اشكمها
فالقسى والقوس قوسي والسهام سهامي
قومٍ احشمها وقومٍ ما يصير احشمها
في قراها ما نزلت ولا بنيت خيامي
مير خذها مثل ما هي مبهمة وافهمها
وافتح ضلوعك لسيل الشاردات الطامي
لفى الهفتاء
بواسطة: لفى الهفتاء
التعديل بواسطة: لفى الهفتاء
الإضافة: الجمعة 2015/03/20 06:26:57 مساءً
إعجاب
مفضلة
متابعة

أضف تعليق

يجب تسجيل الدخول أو الاشتراك أو تفعيل الحساب اذا كنت مشترك لإضافة التعليق


أعلى القصائد مشاهدة للشاعر
أعلى القصائد مشاهدة خلال 24 ساعة الماضية
انتظر معالجة القصيدة ...
جميع الحقوق محفوظة لبوابة الشعراء .. حمد الحجري © 2005 - برمجة وتصميم
info@poetsgate.com